Shahbaz Sharif demands convening of these camera sessions on the situation in Afghanistan

افغانستان کی صورتحال کے پورے خطے پر اثرات ہیں ، کروٹ لیتے حالات میں پاکستان میں قومی اتفاق رائے اور ایک بیانیہ ناگزیر ہے ، قومی مفادات کا تقاضا ہے کہ تمام متعلقہ اسٹیک ہولڈرز ایک پیج پر ہوں۔ اپویشن لیڈر کی گفتگو

اسلام آباد ( اخبارتازہ ترین ۔ 20 اگست 2021ء ) قومی اسمبلی میں اپوزیشن لیڈر شہبازشریف نے افغانستان کی صورتحال پر ان کیمرہ اجلاس بلانے کا مطالبہ کردیا۔ تفصیلات کے مطابق پاکستان مسلم لیگ ن کے صدر شہباز شریف نے کہا ہے کہ پارلیمنٹ کا مشترکہ اجلاس بھی بلایا جائے جس میں درپیش صورتحال پر غور کیا جائے ، قومی وسیاسی سطح پر اس مسئلے اور پاکستان پر ممکنہ اثرات کا تفصیلی تجزیہ کرنے کی ضرورت ہے کیوں کہ افغانستان کی صورتحال کے پورے خطے پر اثرات ہیں ، کروٹ لیتے حالات میں پاکستان میں قومی اتفاق رائے اور ایک بیانیہ ناگزیر ہے ، قومی مفادات کا تقاضا ہے کہ تمام متعلقہ اسٹیک ہولڈرز ایک پیج پر ہوں۔

دوسری جانب افغانستان میں انتقال اقتدار کے معاملے پر حکومت پاکستان نے ہمسایہ ممالک کو اعتماد میں لینے کا فیصلہ کرلیا ، وزیر خارجہ شاہ محمود قریشی متعدد ممالک کا دورہ کریں گے ، سفارتی ذرائع کا کہنا ہے کہ وزیر خارجہ شاہ محمود قریشی جلد 4 ہمسایہ ممالک کا دورہ کریں گے، ان دوروں کے دوران شاہ محمود افغان صورت حال اور انتقال اقتدار سے متعلق گفتگو کریں گے ، وزیر خارجہ جن چار ممالک کا دورہ کریں گے ان میں ترکمانستان ، تاجکستان ، ازبکستان اور ایران شامل ہیں، وزیر خارجہ کا یہ دورہ 25 اگست سے 27 اگست تک ہوگا ، وزیر خارجہ پاکستان اپنے دوروں میں افغانستان میں وسیع البنیاد حکومت کے قیام کی خواہش کا اعادہ کریں گے، ذرائع کا کہنا ہے کہ وزیر خارجہ کے 4 ملکی دورے کے انتظامات کو حتمی شکل دی جا رہی ہے۔

علاوہ ازیں آرمی چیف جنرل قمر جاوید باجوہ سے افغان سیاسی رہنماؤں کے وفد نے اہم ملاقات کی، آئی ایس پی آر کا کہنا ہے کہ صلاح الدین ربانی کی سربراہی میں 8 رکنی وفد نے آرمی چیف سے ملاقات کی ہے، جس میں افغانستان کی صورت حال پر تفصیلی تبادلہ خیال کیا گیا ، اس موقع پر آرمی چیف نے پاکستان کا مؤقف پیش کرتے ہوئے کہا کہ پاکستان افغانستان کے ساتھ وسیع تر تعلقات کا خواہاں ہیں، اور ہم افغانستان میں دیرپا امن کے لیے ہر ممکن اقدامات کے لیے تیار ہیں، معاملات کے حل سے خطے میں دیرپا امن و استحکام آئے گا۔